مجموعة طرائف ونكات عراقية

 

مجيد حسين

 

 

قبل فترة اخويه الجبير جابلي دشداشة وعگال كلي البسهن وتعال وياية لعمامك عود چبير وكذا .. المهم بدلت ولبست الدشداشة والعگال وچان افوت اسلم عادي ورا شوية جابوا الغده من دا اكل چان ادنك ويوگع العگال بالمرگة الله وكيلكم اخويه طلع السفن من اذانه من الضحك واني من يومها بعد ملبست عگال وكل ما اتذكر الموقف اشغل المبردة واوكف كدامها واتفل علمود ترجع عليه

__________________________________________

 

هوه ناقصنه ضيم وقهر حياة العراقيين بأختصار

نت ضعيف وكهرباء ماكو ومي ماكو

ودرجة الحرارة 55!!

تجي تصعد وية ابو التكسي يحجي قصة حياتة يخليك تبچي و اذا كروته ٤ تنطي ٥ تالافات

تنزل من التكسي تلگة واحد يبيع ماي ضاربتة الشمس تشتري منه حته لو ماعطشان

يجيك فقير يبيع كلينكس مجعمط، تضطر تشتري تگول ادعمة حتى لا ينحرف

تطلع ليگدام تلگة رجال بگد ابوك يصبغ قنادر هذا شلون تساعدة بالله لانفسيتك تتقبل يصبغ حذائك ولا تگدر تساعده بصوره  مباشرة

تنقهر وتغلس .

تباوع عالرصيف تلگة عراقية تحجي سوري بنتها بحظنها بنص الطسه بالتبليط وتصيح ساعدوني يهل الرحمة

تطلع بعد مسافة تشوف وحده لابخه وجهها حتى تضيع علامات الكبر تريد تتزوج رجال يستر عليها

تمشي بعد تلگة طالب جامعة كاتله الحر عالرصيف منتظر كيا ماعنده فلوس تكسي

تطلع گبل تلگى ابو المرور حاصر ابو الكيا ماخذ سنويته ويريد يقطه وعايف ابو المظلل

تكمل مشوارك تلكى جندي بالسيطرة خوذة ودرع بتموز  ويصب عرك

تسلم عليه وتگله حياك الله يابطل حتى ترفع معنوياته ومايرد عليك

ترجع للبيت تشوف جوارينك الفايخ طابگ سيارته ابابك وحاصرك

تدخل للبيت تلگى الكهرباء طافية والبيت مجمر

وتروح تريد تسبح تلگه ابنك الصغيرون بالحمام ويغني ضاع العمر وعايش اللحظة

تدخل لغرفتك تفتح فيس تلگي عبود ابن الحافوفه صامطك برساله دينية  يگلولك اذا مارسلتها الله يشمرك بجهنم.

لعد هسه احنه وين مشمورين

_____________________________________________

 

واحد عراقي سألوه :

ليش تزوجت أوكرانية وتركت بنت بلدك ؟

قال : تعالو نحسبهه حساب عرب؟

1-ماكو مهر .. توفير 5ملايين اقل شي

2-ماكو عرس ..... توفير مليون دينار اقل شي

3-ماكو كوافير للعروس و اخواتها توفير. 500 الف دينار اقل شي

4-ماكو مكياج ، حلوين من الله ، توفير كل شهر 50 الف دينار شهريا

5-قليلة في الاكل ، يعني رشاقة وتوفير 40 الف دينار اسبوعيا

* الفوائد المعنوية :

1-تحسين النسل

2-لا يوجد مشاكل مع امها

3-الكل يحسدك على حياتك ويتمنى يكون مثلك

4-تكعد الصبح ما تلكه مخلوق غريب نايم على فراشك

5-متكعد الصبح على ريحة حرك شعر من السشوار

6-أنسى عبارة (أمك قالت وخواتك قالوا)

7-لن تعاني من السحر والشعوذة

8-تشتري اي ثوب بناسبها يعني ما كو داعي زياره لجميع المولات و الاسواق

9-و اذا زعلت منك ترضى بهديه (ورده) مو مثل اللي عدنا لازم طقم ذهب او موبايل

10-وتكسب الآخرة إذا دخلتها الإسلام يعني راح تربح دنيا وآخرة

(كافرة وتدخلها الاسلام خير من مسلمه وتكفرك بدينك )

 شنو رأئيكم؟؟؟؟

________________________________________________

 

الزوجة : شتريدون  اطبخ باجر ؟

الزوج : أي شي .

الزوجة :شنو يعني  أي شي؟ أنت متريد  حتى تساعدني باقتراح.

الزوج : طبخي بامية و تمن

الزوجة : قبل ٣ ايام ماكلين بامية..

الزوج : زين شنو رأيج تبسي بيتنجان

الزوجة:تبسي بيتنجان  بهالحر

الزوج : زين سوي دولمه

الزوجة : ولازم اشتري بيتنجان وشجر و أغسله و أقطعه و أسوي الخبطه  و أحشي  ؟؟؟؟؟

شنو ماكو رحمه اني هم ادميه .

الزوج : زين شوفي أي شغلة سهلة و موجودة عندج و طبخيها وفضينه

الزوجة : يعني ما مرة تريحني وتجاوبني  دائماً مريح نفسك  انت.

الزوج : زين كولي اقتراحاتج و أني اختار منها.

الزوجة : اقتراااحاااتي ؟ يعني أني مدا اعرف  أختار صنف واحد و أنت تريد اكول اقتراااحاات.

الزوج : شو رأيج  أكلة خفيفة مثلاً علبة مارتديلا و جبن ورگي ؟

الزوجة :  كافي أني فكرت اسوي  كباب عروگ وشوية بتيته مقلية وزلاطه؟

الزوج : الله عليج و على أفكارج

الزوجة : هذا اللي أنت فالح بي بس تصنف وتقلد

و في اليوم التالي صار اتصال تليفوني من الزوجة للزوج:

الزوجة : ألو  جيب وياك مشروبات غازية  من تجي لان طلبت سمچ مشوي و تمن( دليفري).

الزوج : أنتي مو كلتي راح ناكل كباب عروك و بتيته؟؟

الزوجة : و الله ماتفرغت لأن من كعدت من النوم ولحد الان و أني اغسل هدوم ومواعين و انظف الطوله اللي جهالك مسويها منين اجيب وقت حتى اطبخ ؟ حرام عليكم أنتو طلباتكم ما تخلص اصلا..

الزوج : شنو المشروبات الغازية الي تريدين.؟

"سبرايت" و لا "سفن أب"؟

الزوجة : أي شي.

الزوج : يرجع الى البيت و يجلس على المائدة و يمد ايده على زجاجة"سبرايت " من الكيس و يخليها على ميز الطعام

الزوجة : شنو هذا..؟ يعني ماكدرت تجيب سفن أب ؟ أنت دائماً ذوقك غريب هيج

الزوج : ايمد  ايده على الجيس و يطلع زجاجه (ثانية) سفن أب و يضعها على المائدة.

الزوجة : أكعد انت بذر  بالفلوس و آخر الشهر تكول  وين يروح الراتب ؟؟؟

الزوج : يأكل في صمت.

الزوجة : أها... ما كلتلي شتريدون غده الباجر؟

الزوج : شلل نصفى ...

________________________________________________________

 

سالفة ورباط !!!!

قال الحكيم: السمكة التي تغلق فمها لن يصطادها أحد

قال أحد الحضور : واذا صادوها بشبك؟

قال الحكيم: الاخ من وين؟

قال: من العراق

قال الحكيم: يقال اذكى شعوب العالم هم أهل العراق

*بعد اسبوع.. جلس الحكيم نفسه مع مجموعة من الناس ليخبرهم حكمة اخذها من قصة

فقال حكيم : سرق ٣ أشخاص قصر ووضعوا الكنز على ظهر الحمار

وبالطريق اتفق اثنان على قتل الثالث وتقاسم الغنيمه فقتلوه ، وبالليل قرر أحدهم قتل الآخر والحصول على كل الكنز فقتله .. وبينما يصعد الرجل الجبل زلت قدمه وسقط ومات ..

وعاد الحمار بالكنز إلى القصر ..

فالحلال يعود لصاحبه ..

تأثر الحضور جميعاً، إلا عراقي سأل الشيخ : إذا الحرامية الثلاثة ماتوا ! چا منو الحچالك القصة بالتفصيل؟؟ الحمار مثلا حجالك ؟؟

قال الحكيم :من رخصتك اخي من وين گتلي حضرتك..؟؟؟؟

رد عليه العراقي سبق وأن گتلك عراقي الحكيم هز راسه

وگال انتم العراقيين اذكى شعوب العالم چا شمالكم تتقشمرون

ب لوري سبيس

وطابوا مزيف

وتعيين چذب ؟؟؟؟؟؟؟؟؟؟؟؟

_____________________________________________________